ਕੁੱਲ ਸਵਾਰੀਆ ਵਿੱਚੋ ਇਕ ਛੋਟੇ ਬੱਚੇ ਸਮੇਤ 9 ਮਾਮੂਲੀ ਅਤੇ 3 ਗੰਭੀਰ ਰੂਪ ਵਿੱਚ ਜ਼ਖਮੀ ,
ਬੱਸ ਡਰਾਈਵਰ ਮੋਕੇ ਤੋ ਬੱਸ ਛੱਡ ਕੇ ਹੋਇਆ ਫਰਾਰ
ਬੰਗਾ, 12 ਸਤੰਬਰ :- ਅੱਜ ਬੰਗਾ ਮੁੱਖ ਮਾਰਗ ਤੇ ਨਜ਼ਦੀਕ ਸਿੱਖ ਨੈਸ਼ਨਲ ਕਾਲਜ ਇਕ ਨਿੱਜੀ ਕੰਪਨੀ ਦੀ ਬੱਸ ਦੇ ਬੇਕਾਬੂ ਹੋਕੇ ਇਕ ਡਰਾਈਵਿੰਗ ਸਕੂਲ ਦੀ ਦੁਕਾਨ ਅੰਦਰ ਵੜ੍ਹਨ ਨਾਲ ਬੱਸ ਵਿੱਚ ਸਵਾਰ ਕੁੱਲ ਸਵਾਰੀਆ ਵਿੱਚੋ ਇੱਕ ਬੱਚੇ ਸਮੇਤ 9 ਸਵਾਰੀਆ ਦੇ ਮਾਮੂਲੀ ਜਦੋ ਕਿ 3 ਸਵਾਰੀਆ ਦੇ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।ਮੋਕੇ ਤੇ ਜਾਣਕਾਰੀ ਦਿੰਦੇ ਬੱਸ ਦੇ ਕੰਡਕਟਰ ਕੁਲਦੀਪ ਰਾਮ ਪੁੱਤਰ ਤੁਲਸੀ ਰਾਮ ਵਾਸੀ ਬਹਿਰਾਮ ਨੇ ਦੱਸਿਆ ਕਿ ਉਹ ਨਿੱਜੀ ਕੰਪਨੀ ਦੀ ਬੱਸ ਨੰਬਰ ਪੀ ਬੀ 32 ਜੇ 9981 ਦਾ ਕੰਡਕਟਰ ਹੈ ਤੇ ਉਹ ਅੱਜ ਰੋਜ਼ਾਨਾ ਦੀ ਤਰ੍ਹਾਂ ਬੱਸ ਡਰਾਈਵਰ ਜਿਸ ਦਾ ਨਾਮ ਕਾਲਾ ਹੈ , ਜੋ ਕਿ ਪਿੰਡ ਝਿੰਗੜਾ ਜ਼ਿਲ੍ਹਾਂ ਸ਼ਹੀਦ ਭਗਤ ਸਿੰਘ ਦਾ ਰਹਿਣ ਵਾਲਾ ਹੈ ਨਾਲ ਰੋਜ਼ਾਨਾ ਦੀ ਤਰ੍ਹਾਂ ਨਵਾਸ਼ਹਿਰ ਤੋ ਜਲੰਧਰ ਲਈ ਜਾ ਰਹੇ ਸਨ । ਉਸ ਦੱਸਿਆ ਕਿ ਜਿਵੇ ਹੀ ਉਹ ਦੁਰਘਟਨਾ ਸਥਾਨ ਨਜ਼ਦੀਕ ਪੁੱਜੇ ਤਾ ਉਸ ਨੂੰ ਬੱਸ ਦੇ ਡਰਾਈਵਰ ਨਾਮੀ ਕਾਲਾ ਨੇ ਦੱਸਿਆ ਕਿ ਉਸ ਨੂੰ ਚੱਕਰ ਆ ਰਹੇ ਹਨ।ਉਸ ਦੱਸਿਆ ਕਿ ਉਸਨੇ ਡਰਾਈਵਰ ਨੂੰ ਬੱਸ ਨੂੰ ਸਾਈਡ ਤੇ ਲਾਉਣ ਲਈ ਕਿਹਾ ਸੀ ਕਿ ਬੱਸ ਬੇਕਾਬੂ ਹੋਕੇ ਪਹਿਲਾ ਸੜਕ ਕਿਨਾਰੇ ਬਣੇ ਬਰਸਾਤੀ ਨਾਲੇ ਦੀ ਛੱਤ ਨਾਲ ਟਕਰਾਉਣ ਉਪੰਰਤ ਇਕ ਦੁਕਾਨ ਵਿੱਚ ਜਾ ਵੜ੍ਹੀ। ਉਸ ਦੱਸਿਆ ਕਿ ਬੱਸ ਵਿਚ ਕੁੱਲ 25 / 26 ਦੇ ਕਰੀਬ ਸਵਾਰੀਆ ਸਨ। ਜੋ ਨਵਾਸ਼ਹਿਰ ਤੋ ਵੱਖ ਵੱਖ ਸਥਾਨਾ ਤੇ ਜਾ ਰਹੀਆ ਸਨ ਦੇ ਸੱਟਾ ਲੱਗੀਆ ਹਨ। ਜਦੋ ਕਿ ਹਾਦਸੇ ਉਪੰਰਤ ਬੱਸ ਦਾ ਡਰਾਈਵਰ ਮੋਕੇ ਤੋ ਫਰਾਰ ਹੋ ਗਿਆ । ਜਦੋ ਕਿ ਬੱਸ ਵਿੱਚ ਸਵਾਰ ਸਵਾਰੀਆ ਮਨੂੰ ਪੁੱਤਰ ਵਿਪਨ ਕੁਮਾਰ ਨਵਾਸ਼ਹਿਰ , ਅਖਿਲੇਸ਼ ਤਿਵਾੜੀ ਪੁੱਤਰ ਸ਼ੰਕਰ ਦੇਵ ਨਿਵਾਸੀ ਨਵਾਸ਼ਹਿਰ ਅਨੁਸਾਰ ਬੱਸ ਦੀ ਸਪੀਡ ਜਿਆਦਾ ਸੀ ਅਤੇ ਬੱਸ ਦਾ ਡਰਾਈਵਰ ਬੱਸ ਨੂੰ ਬਹੁਤ ਹੀ ਗਲਤ ਢੰਗ ਨਾਲ ਚਲਾ ਰਿਹਾ ਸੀ । ਦੁਰਘਟਨਾ ਦੀ ਸੂਚਨਾ ਮਿਲਦੇ ਹੀ ਉਪ ਪੁਲਿਸ ਕਪਤਾਨ ਸਬ ਡਵੀਜ਼ਨ ਬੰਗਾ ਸਰਵਨ ਸਿੰਘ ਬੱਲ ,ਐਸ ਐਚ ਉ ਸਿਟੀ ਬੰਗਾ ਬਲਵਿੰਦਰ ਸਿੰਘ ਸਮੇਤ ਪੁਲਿਸ ਪਾਰਟੀ ਮੋਕੇ ਤੇ ਪੁੱਜ ਗਏ ਅਤੇ ਬੱਸ ਵਿੱਚ ਸਵਾਰ ਸਵਾਰੀਆ ਨੂੰ 108 ਐਂਬੂਲੈਸਾਂ ਦੀ ਮਦਦ ਨਾਲ ਸਿਵਲ ਹਸਪਤਾਲ ਬੰਗਾ ਪੁਹੰਚਾਇਆ ਗਿਆ। ਜਿੱਥੇ ਡਿਊਟੀ ਤੇ ਤਨਾਇਤ ਡਾਕਟਰਾ ਅਤੇ ਹੋਰ ਸਟਾਫ ਵੱਲੋਂ ਤੇਜ਼ੀ ਨਾਲ ਜ਼ਖਮੀਆ ਦਾ ਇਲਾਜ਼ ਕਰਨਾ ਸ਼ੁਰੂ ਕਰ ਦਿੱਤਾ।
ਹਾਦਸੇ ਦੋਰਾਨ ਕੋਣ ਕੋਣ ਹੋਇਆ ਜ਼ਖਮੀ- ਉਕਤ ਹੋਇਆ ਹਾਦਸਾ ਇੰਨਾ ਜ਼ਬਰਦਸਤ ਸੀ ਕਿ ਹਾਦਸੇ ਵਿੱਚ ਬੱਸ ਦੇ ਪਰਖੱਚੇ ਉੱਡ ਗਏ , ਉਥੇ ਹੀ ਦੁਕਾਨ ਦਾ ਵੀ ਕਾਫੀ ਨੁਕਸਾਨ ਹੋਇਆ ਉਕਤ ਹੋਏ ਹਾਦਸੇ ਵਿੱਚ ਬੱਸ ਕੰਡਕਟਰ ਕੁਲਦੀਪ ਰਾਮ ਪੁੱਤਰ ਤੁਲਸੀ ਰਾਮ ਵਾਸੀ ਬਹਿਰਾਮ ,ਕਮਲਜੀਤ ਕੋਰ ਪਤਨੀ ਕਰਨੈਲ ਸਿੰਘ ਵਾਸੀ ਬੱਲਿਆ (ਯੂ ਪੀ ),ਕਿਰਨ ਪੁੱਤਰੀ ਅਜੈ ਕੁਮਾਰ ਵਾਸੀ ਨਵਾਸ਼ਹਿਰ ,ਆਸ਼ਾ ਪਤਨੀ ਕਰਨ ਕੁਮਾਰ ਵਾਸੀ ਜਲੰਧਰ , ਦੀਪਕ (3) ਪੁੱਤਰ ਕਰਨ ਵਾਸੀ ਜਲੰਧਰ , ਮਨੂੰ ਪੁੱਤਰ ਵਿਪਨ ਕੁਮਾਰ ਨਵਾਸ਼ਹਿਰ ,ਅਖਿਲੇਸ਼ ਤਿਵਾੜੀ ਪੁੱਤਰ ਸ਼ੰਕਰ ਦੇਵ ਨਿਵਾਸੀ ਨਵਾਸ਼ਹਿਰ , ਅਮਨਦੀਪ ਕੋਰ ਪੁੱਤਰੀ ਜਗਨ ਨਾਥ ਕਾਹਮਾ , ਮਹਿਤਾ ਬਹਾਦੁਰ ਪੁੱਤਰ ਸ਼ੰਭੂ ਲਾਲ ਬਹਾਦੁਰ ਨਿਊ ਜਵਾਹਰ ਨਗਰ ਜਲੰਧਰ , ਗੁਰਬਖਸ ਕੋਰ ਪਤਨੀ ਰਣਜੀਤ ਸਿੰਘ ਮਗੰਵਾਲ , ਸੰਦੀਪ ਕੋਰ ਪਤਨੀ ਪਰਗਟ ਸਿੰਘ ਰਾਹੋਂ ਹੋਏ ਹਾਦਸੇ ਦੋਰਾਨ ਜ਼ਖਮੀ ਹੋ ਗਏ ਜਿਨ੍ਹਾਂ ਵਿੱਚੋ ਅਖਿਲੇਸ਼ ਤਿਵਾੜੀ ਪੁੱਤਰ ਸ਼ੰਕਰ ਦੇਵ , ਅਮਨਦੀਪ ਕੋਰ ਪੁੱਤਰੀ ਜਗਨ ਨਾਥ ,ਮਹਿਤਾ ਬਹਾਦੁਰ ਪੁੱਤਰ ਸ਼ੰਭੂ ਲਾਲ ਬਹਾਦੁਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ ਜਿਨ੍ਹਾਂ ਨੂੰ ਮੁੱਢਲੀ ਸਹਾਇਤਾ ਦੇਣ ਮਗਰੋ ਨਵਾਸ਼ਹਿਰ ਸਿਵਲ ਹਸਪਤਾਲ ਲਈ ਰੈਫਰ ਕਰ ਦਿੱਤਾ ਗਿਆ।